Асыҡ һауалағы музейҙың беренсе композицияһын урынлаштырыуҙа Өфө моторҙар эшләү берекмәһе булышлыҡ иткән. Предприятие ҡала халҡы һәм ҡунаҡтарын легендар «Еңеү моторы»ның макеты менән таныштыра. Ул Бөйөк Ватан һуғышы осоронда Владимир Климов етәкселегендәге тәжрибә-конструкторлыҡ бюроһы тарафынан эшләнгән. Өфөлә етештерелгән двигатель Совет авиацияһының өҫтөнлөгөн тәшкил иткән. Шуға ла Бөйөк Еңеүҙе яҡынайтыуҙағы өлөшө ҙур.
Әйткәндәй, асыҡ һауалағы музей йыл дауамында байытыла барасаҡ. Яҡын арала нефть етештереүҙә файҙаланылған ҡоролмаһының да урынлаштырыуы көтөлә. Өфөнөң «Хеҙмәт ҡаһарманлығы ҡалаһы» стеллаһының эргә-тирәһе тап Бөйөк Еңеүгә тос өлөш индергән сәнәғәт предприятиелары тураһында бәйән итә.