Өфөлә «Ат уйнатып» тип исемләнгән хәрби - патриотик уйынына йомғаҡ яһалды. Өс ай дауамында барған сара Рәсәй Геройы Миңлеғәле Шайморатовтың яҡты иҫтәлегенә арналды. «Тамыр» телеканалы башланғысында ойошторолған проекттың исем туйы «Родина» кинотеатрында үтте. Ентеклеберәк БЮТ хәбәрсеһе Розалиә Ҡунысбаева.
Хәрби-патриотик уйын «Ат уйнатып» тип исемләнһә лә балалар һыбай сапманы, киреһенсә, мәктәптә алған белемдәрен һынаны. Ул еңелдән бирелмәне. Рухи көс, сыҙамлыҡ, етдилек талап ителде. Командала эшләү төп бурыстарҙың береһе.
Өс этаптан торған сарала республика район-ҡалалары мәктәптәренең Шайморатовсылар кластары ҡатнаша. Уйынға быйыл 69 ғариза ҡабул ителһә, уларҙың 16-ы һайлап алыу туры аша үткән . Квест-уйындарҙа ҡатнашҡан иң етеҙ биш команда финалға сыға .
«Тамыр» телеканалы ойошторған проект республика башлығы гранты ярҙамында тормошҡа ашырыла. Сараға Башҡортостандың фән һәм мәғариф министрлығы ла булышлыҡ иткән.
Илһөйәрлек рухында һуғарылған сара үҙ маҡсатына иреште, тип билдәләй ойоштороусылар. Проекта ҡатнашҡан балалар үҙҙәренә дәрт-дарман өҫтәп кенә ҡалманы, аңлатып биргеһеҙ хистәр ҙә кисерҙе. Күңелдәренә Ватансылыҡ тойғоһон һеңдерҙе.
Розалиә Ҡунысбаева