Проект Рәсәйҙең яңы төбәктәре уҡыусыларын илдең ҡалалары, тарихи-мәҙәни ҡомартҡылары менән таныштырыуҙы маҡсат итеп ҡуя. Составта Луганск, Донецк республикаларынан, Херсон, Запорожье өлкәләренән, Себер, Алыҫ көнсығыш федераль округынан уҡыуҙа, спортта, йәмәғәт эштәрендә алдынғы булған 100-гә яҡын уҡыусы. Улар бөгөн Башҡортостандың баш ҡалаһы менән танышты. Сәфәр тураһында БЮТ хәбәрсеһе Рәмзиә Кәримова репортажы.
Беҙҙең урам геройҙары йәки Геройҙар поезы Бөтә Рәсәй проекты 2023 йылдан тормошҡа ашырыла. Быйыл поездың маршруты 9 ҡала аша үтә, Новосибирскийҙан Дондағы Ростовҡа тиклем, Өфө был графиктағы бишенсе ҡала.
Геройҙар поезы 6 сентябрҙән алып юлда, әммә сәфәр оҙайлы булыуға ҡарамаҫтан балаларҙың кәйефе күтәренке. Өфө тимер юл вокзалына ла улар шаярып-көлөп, йырлап килеп төштө. Ә үҙенең 450 йыллыҡ тарихи юбилейын билдәләгән Башҡортостандың баш ҡалаһы ҡунаҡтарҙы ҡояшлы, йылы көн һәм сағыу тамаша менән ҡаршы алды.
Өфө балалар филармонияһы тиҫтерҙәре өсөн бай йөкмәткеле мәҙәни программа әҙерләгән. Улар ҡыҫҡа ғына ваҡыт эсендә ҡунаҡтарҙы милли музыка ҡоралыбыҙ ҡурай менән таныштырып та, концерт программаһы менән сығыш яһап та өлгөрҙө.
Башҡортостандың мәғариф һәм фән министрлығы проектта ҡатнашыусылар өсөн бай программа әҙерләгән. Уҡыусыларҙы Өфө буйлап экскурсия, Шайморатов һәйкәленә сәйәхәт, Альбанов, Шаляпин исемендәге музейҙар менән танышыу, концерт программаһы көтә.
Беҙҙең урам геройҙары, йәғни Геройҙар поезы проекты Рәсәй Президенты ярҙамы менән тормошҡа ашырыла. Ул илебеҙҙең яңы төбәктәре уҡыусыларын бай тарихыбыҙ менән таныштырыу, алдынғы уҡыусыларҙы дәртләндереү йәһәтенән оло әһәмиәткә эйә. Проект йәш быуын өсөн танышыу, аралашыу сараһы ла булып тора.
«Геройҙар поезы» проекты буйынса ойошторолған сәфәр оҙайлы, әммә программаһы фәһемле һәм мауыҡтырғыс. Уҡыусылар һәр ҡалала тарихи-мәҙәни ҡомартҡыларыбыҙ менән таныша, иҫтәлекле урындар буйлап сәйәхәт итә. Балалар кисә Екатеринбургта булған, бөгөн Өфөлә. Ә иртәгә ҡунаҡтарҙы Һамар ҡалаһы ҡабул итә.
Рәмзиә Кәримова