Заман һөнәре. Мифтахетдин Аҡмулла исемендәге Башҡорт дәүләт педагогия университетында «Мультироторлы пилотһыҙ осоу аппараты белгесе һәм операторы» программаһы буйынса уҡыуҙар башланды. Унда Өфө вуздарынан йыйылған 50 кеше белем ала.
Программаны Аҡмулла университеты менән Башҡортостандың Фәнни-мәғариф үҙәгенең идарасы компанияһы тормошҡа ашыра. Уның маҡсаты - 30 килограмм һәм унан кәмерәк пилотһыҙ авиация системаларын файҙаланыу буйынса белгес әҙерләү. Пилотһыҙ аппараттар бөгөн төрлө өлкәләрҙә, шул иҫәптән фәндә, ауыл хужалығында, Ғәҙәттән тыш хәлдәр министрлығында ҡулланыла. Һәм, әлбиттә, был өлкәләр көндән-көн киңәйәсәк. Шуға күрә квадрокоптерҙар менән идара итә алырлыҡ белгестәр әҙерләү мөһим, тигән фекерҙә университет етәкселеге.
Программа сиктәрендә мультироторлы пилотһыҙ осоу аппараттарын йыйыу, көйләү һәм файҙаланыу буйынса компетенциялар формалаша. Тыңлаусылар тәүҙә симуляторҙа, һуңынан асыҡ һауала осоу күнекмәләрен шымарта.