Бөгөн ул шөғөлөн яңы кимәлгә күтәреү маҡсатында федераль грант та яулаған. Башҡортостандан 9 проект араһынан һайлап алынған 4 эш араһында Ғафури районынан шәхси эшҡыуар ҙа бар. БЮТ хәбәрсеһе Азат Ғәлиуллин дауам итә.
Линар Сөләймәнов миҙгелде уңышлы тамамлап, умарталарҙы ҡышҡылыҡҡа әҙерләгән. Быйыл ул бал юҡлыҡҡа һылтанып ултырмай, республиканың төрлө райондарына сығып эшләй. Туғандарына ла, һатыуға ла етерлек продукция айыртып алыуға өлгәшә. Шәхси эшҡыуар ҡасандыр Стәрлетамаҡта ҙур предприятиеларҙың береһендә бухгалтер, иҡтисадсы, маркетинг һәм һатыу өлкәһендә эшләй. Умартасылыҡ замандашыбыҙҙың тормошон ҡырҡа үҙгәртә.
Маҡсат оҙаҡ көттөрмәй. Замандашыбыҙ «Агростартап» дәүләт программаһы ярҙамында эшкә ныҡлап тотона. Бал ҡорттары күстәре менән бергә, кәрәкле эш ҡоралдары, умарта ултыртыр ер участкаһы ала. Кәсепте дүрт йыл ныҡлап өйрәнгәндән һуң, Линар Сөләймәнов үҙен агротуризм тармағында һынап ҡарарға була.
Башҡортостандан федераль грантҡа тәҡдим ителгән 9 бизнес-пландың дүртәүһе уңышлы тип табыла. Улар араһында Линар Сөләймәновтың эше лә бар.
Ә агротуризм үҫтерәләсәк биләмә осраҡлы һайланмаған. Ташаҫты менән Имәндәш ауылдары эргәһендә урынлашасаҡ комплекс хозур тәбиғәте менән һоҡландыра. Шуға ла Еҙем йылғаһы буйлап йөҙөү, Киндерле мәмерйәһенә сәйәхәт ойоштороу ҙа күҙаллана. Эш киләһе йыл тормошҡа ашырыла башлар тип көтөлә.
Азат Ғәлиуллин