Ауылдарға заманса медицина ярҙамы. Учалы районында «Сәләмәтлек» милли проекты ярҙамында һигеҙ йыл эсендә 17 фельшер-акушерлыҡ пункты төҙөлгән. Йыл аҙағына тиклем тағы 2 ФАП файҙаланыуға тапшырыласаҡ.
Уларҙың береһе Бәләкәй Ҡаҙаҡҡол ауылында. Төҙөлөш октябрь аҙағында башлана. Бер ай эсендә модулле фельдшер-акушерлыҡ пункты ҡалҡып сыға, инженер селтәрҙәре, канализация үткәрелә. Яңы бинала пациенттарҙы ҡабул итеү, процедура-прививка кабинеттары, көтөү урыны, санитар һәм персонал өсөн сисенеү бүлмәләре ҡаралған. Быға тиклем ФАП 90-сы йылдар башында төҙөлгән өйҙә урынлашҡан була. Уны утын менән йылытып торорға, пациенттарҙы ҡабул иткән арала һыу ташырға тура килгән. Урындағы фельдшер Бәләкәй Ҡаҙаҡҡол һәм Ҡалуй ауылдарында йәшәүсе 500-ҙән ашыу кешене хеҙмәтләндерә.
Йыл аҙағына тиклем ошондай уҡ фельдшер-акушерлыҡ пункты Баттал ауылында ла сафҡа инәсәк. Бынан тыш, «Сәләмәтлек» милли проекты сиктәрендә Учалы үҙәк район дауаханаһында балалар поликлиникаһы төҙөлөшө башланған. Ул көнөнә 300 кешене ҡабул итә аласаҡ.