Заман талаптарына яуап биргән бина «Мәҙәниәт» милли проекты буйынса төҙөлгән. 15 йыл клубһыҙ йәшәгән халыҡ өсөн ул ҙур бүләк. Урында йәшәүселәрҙең шатлығын БЮТ хәбәрсеһе Әлфинә Килдейәрова уртаҡлашты.
«Шишмә» ансамбле вәкилдәре сәхнәлә йырлап-бейеп кенә ҡалмай, махсус хәрби операция яугирҙарына ойоҡбаш-бейәләйҙәр ҙә бәйләй. Йыйылыр өсөн яңы урын - мәҙәниәт йорто асылыуы ауыл тормошона яңы һулыш бирә. Мәктәп менән бер бинала булған элекке клуб 15 йыл элек үк авария хәлендә тип танылып, һүтелә. Ләкин ауыл халҡының ижад менән шөғөлләнергә теләге көслөрәк булып сыға.
Мәҙәниәт усағы элекке бина урынында төҙөлә. Ошо маҡсатта «Мәҙәниәт» милли проектына ярашлы федераль бюждеттан 36, республика ҡаҙнаһынан 7 миллион һум аҡса бүленә. Район хакимиәте 900 мең һум ҡуша. Төҙөлөш майҙа башланып, ярты йыл эсендә 265 квадрат метрлыҡ модулле бина ҡалҡып сыға.
Түрбейек ауылы төпкөлдә урынлашҡан, унда 160 кеше йәшәй. Ләкин мәҙәниәт йорто ишеге урындағылар өсөн генә түгел, күрше ауылдар халҡы өсөн дә асыҡ. Әле үк уның сәхнәһендә бер нисә концерт ҡуйылған
Саралар үткәреү өсөн бар уңайлыҡтар ҙа булдырылған. Заманса яҡтыртыу һәм акустик системалар, яңы мебель. Тамашалар залының модулле конструкцияһы ултырғыстарҙы алып, майҙанды ҙур фойеға әйләндерергә мөмкинлек бирә. Шулай уҡ, аккардеон, баян һәм хромка һатып алынған. Ингән урында теннис өҫтәле урынлашҡан.
Әлфинә Килдейәрова