Башҡортостан «Башҡорт сода компанияһы» өҫтөнән контролен һаҡлаясаҡ, директорҙар советында күпселекте төбәк вәкилдәре тәшкил итәсәк. Был турала эксперттар Владимир Путиндың «Башҡорт сода компанияһын» стратегик предприятиелар исемлегенән сығарыу тураһындағы Указы хаҡында фекер йөрөтөп белдерә. Ил Президенты Указға дүшәмбе көн ҡул ҡуйғайны. Башҡорт сода компанияһы - республиканың төп активтарының береһе, шуға ла уның артабанғы яҙмышы күптәрҙе борсой. Әммә, борсолоу өсөн урын юҡ тип билдәләйҙәр Башҡортостан башлығының матбуғат хеҙмәтендә. Эксперттар әйтеүенсә, БСК-нан алынған килем республикала йәшәүселәр өсөн социаль гарантияларҙы тормошҡа ашырыуға йүнәлтеләсәк. БСК-ны стратегик предприятиелар исемлегенән сығарыу республика мәнфәғәтен иҫәпкә алып ентекле уйланылған аҙым. Ул инвестициялар йәлеп итеү, производствоны модернизациялау һәм төбәктең сәнәғәт потенциалын киңәйтеү өсөн яңы мөмкинлектәр асасаҡ, ти политологтар.