Путевкаһыҙ ҙа, аҡсаһыҙ ҙа ҡалғандар. Республиканан ике тиҫтәнән ашыу кеше үҙҙәрен туристик агент эшмәкәрлегенән зыян күреүсе тип иҫәпләй. Билдәләнгән ваҡытта сит илдә ял итеү буйынса алдан килешеүҙәр төҙөлә, авиабилеттар һәм ҡунаҡханала йәшәү урындары өсөн түләүҙәр башҡарыла. Әммә менеджер ваучер һәм башҡа тейешле документтарҙы клиенттарына тапшырыр урынға вәғәҙәләр менән генә ымһындыра башлай. Йыл ярымдан ашыу дауам иткән аңлашылмаусанлыҡтар тураһында киләһе яҙма.
Көн һайын вәғәҙәләр ала торғас, Төркиәгә осорға көнө лә килеп етә. Өфөнән Әлиә менән Артем Ғәлиевтар былтыр йәй балалары менән бергә сит илдә ял итергә була. Туристик агент менән февралдә үк килешеүҙәр төҙөлә, быға тиклем менеджер аша ғаилә Мысырҙа булып ҡайтҡанға күрә, аҡсаһын да алдан ышанып тапшыралар. Әммә икенсе осраҡта путевкалар ғына ҡулдарына килеп етмәй.
Ғәлиевтарҙың путевкаһы яҡынса 300 мең һумға төшкән. Бер йыл эсендә менеджер сумманың тик яртыһын ғына ҡайтарған. Билдәле булыуынса, туристик агентҡа мөрәжәғәт иткән тағы ла ике тиҫтәнән ашыу кеше путевкаһыҙ ҡалған. Абхазия, Мысыр һәм башҡа сит илдәрҙә диңгеҙ буйында ял итергә теләгән яҡташтарыбыҙ араһында өфөләрҙән тыш, Сибай ҡалаһы һәм Ҡырмыҫҡалы районында йәшәүселәр ҙә булған. Бер ғаилә менеджерға ышанып, 700 мең һумын елгә осорған.
Менеджерҙы яуаплылыҡҡа тарттырыу буйынса полиция, прокуратураға ла мөрәжәғәттәр яҙыла. Әммә әлегә бер ниндәй саралар ҙа күрелмәгән. Граждандар үҙ хоҡуҡтарын судта яҡлау менән генә сикләнә. Туристик агент иһә аҡсаны тулыһынса ҡайтарам тип йәнә вәғәҙәләр генә ҡалдыра.
Алданған туристар юрист менән дә осрашты. Белгес шунда уҡ килешеүҙәге етешһеҙлектәргә иғтибар йүнәлтте. Менеджер бер ниндәй туроператор исеменән дә сығыш яһамаған, документ шәхси эшҡыуарҙар-ҡатындың туғандары менән төҙөлгән.
Сит илдә ял итеп, ҡояшта ҡыҙыныр урынға суд тупһаһын тапарға мәжбүр булған граждандар берләшеп, туризм өлкәһендә эшләгән белгесте һәм уның командаһын енәйәти яуаплылыҡҡа тарттырырға теләй. Ошо маҡсатта яҡын арала тәфтиш комитетына ла мөрәжәғәт буласаҡ.
Гөлназ Хәйбуллина