Өфөлә дүрт ай элек асылған Республика кардиология үҙәгенең хирургия корпусында ҡатмарлы операциялар уңышлы үтә. Аҡ халатлылар республиканан ситкә сыҡмай үҙебеҙҙә 5 меңдән ашыу пациенттың йөрәген ҡотҡарған. Заманса учреждениела йөрәк-ҡан тамырҙары сирҙәрен асыҡлау, дауалау, операция үткәреү, реабилитация үтеү өсөн шарттар тыуҙырылған. Ҡатмарлы операция барышын БЮТ ижади төркөмө лә күҙәтте. Тулырыҡ мәғлүмәт БЮТ хәбәрсеһе Флорида Ким яҙмаһында.
Ҡатмарлы операция. Бер төркөм табиптар пациенттың йөрәгенә клапан үткәрә. Республика кардиология үҙәгенең яңы хирургия корпусында операция заманса технологиялар ярҙамында яһала. Аҡ халатлылар пациенттың аяғы аша лазер менән катетер үткәреп клапанды йөрәккә беркетә.
хирургка кардиолог, анестезиолог, реаниматолог, УЗИ белгесе ярҙам итә. Табиптар операцияны ҙур экрандар аша күҙәтеп йөрәк эшмәкәрлеген контролдә тота. Йөрәккә индерелгән клапан ҡан әйләнешен көйләп пациенттың йәшәү сифатын яҡшырта.
Яңы хирургия корпусы сафҡа инеү менән Өфө кардиология үҙәге илдә иң ҙуры һанала. Бында сменаһына 320 пациентты ҡабул итергә мөмкин. Заманса бинала 10 реанимация блогы, диагностика, кардиохирургия һәм административ бүлектәр, поликлиника эшләй.
Башҡортостанда кардиология үҙәгендә йыл һайын 14 меңдән ашыу пациент стационар һәм 90 меңдән ашыу кеше консультатив ярҙам ала. Кардиология үҙәгенең яңы корпусы операциялар һанын арттырырға, профилактика эшен көйләргә мөмкинлек бирә. Ул фәнни-ғәмәли үҙәк булараҡ та эшләй, сөнки кардиология үҙәге хеҙмәткәрҙәренең күбеһе ғилми тикшренеүҙәр ҙә алып бара.
Флорида Ким