Өфөлә ун беренсе тапҡыр халыҡ-ара марафон үтте

Спорт байрамында Рәсәйҙең 52 төбәге һәм донъяның 38 иленән йүгереүселәр ҡатнашты. Стартҡа 10 меңдән ашыу кеше баҫты. Улар 2, 5, 10, 21 һәм 42 километрға йүгерҙе. Марафон маршруты ҡаланың тарихи үҙәге буйлап үтте. “Спорт төрлө быуындарҙы берләштерә һәм сәләмәт киләсәккә нигеҙ.Кешеләр төрлө дистанциялы трассаларға сыға. Был атмосфера йәнә бер тапҡыр республика Рәсәйҙең спорт төбәге булыуын иҫбатлауы хаҡында һөйләй”,- тине Республика Хөкүмәте Премьер-министры Андрей Назаров.

Быйылғы марафон “Йондоҙҙар Өфөлә осрашты” девизы менән ойошторолдо. Билдәле ҡунаҡтар араһында танылған футболсы Алексей Смертин да булды.

“Өфө марафоны берҙәмлек байрамы”, - тип белдерҙе Паралимпия чемпионы, Дәүләт Думаһы депутаты Рима Баталова.

Марафонда беҙҙең коллегалар ҙа ҡатнашты. Улар 2 һәм 5 километр араға йүгерҙе.

Марафондың абсолют еңеүсеһе тип ир-егеттәрҙән Виталий Дьяконов, ҡатын-ҡыҙҙарҙан Ульяна Шарикова танылды.