Быйыл Башҡортостанда етем балаларҙы торлаҡ менән тәьмин итеүгә 2 миллиард 800 миллион һум аҡса бүленгән. Фатирҙар йәки уларҙы һатып алыу өсөн сертификаттар менән йыл аҙағына тиклем 750 кеше тәьмин ителәсәк.
Өфөлә йәшәүсе Руслан Миғәзов 18 йәшендә үк дәүләттән фатир алыуға сиратҡа тора. Балалар йортонан һуң әрмелә хеҙмәт итә, унан һуң контракт төҙөп, махсус хәрби операцияға юллана. Алыштарҙың береһендә уң яҡ ҡулы яраланып, госпиталгә эләгә. Әле 24 йәшлек Руслан инвалидлыҡ юллай. Тыуған яғына ҡайтҡас та, фатир алыуға сираты яҡынлашыуы тураһында хәбәр итәләр. Торлаҡ баш ҡаланың Кузнецов Затоны биҫтәһендә урынлашҡан. Ошоға тиклем Русланға ҡатыны һәм биш айлыҡ сабыйҙары менән ҡуртымға алынған фатирҙа йәшәргә тура килгән.
Етем һәм ата-әсә ҡарауынан мәхрүмдәрҙе торлаҡ менән тәьмин итеү буйынса вәкәләт 2013 йылдан урындағы муниципалитеттарға йөкмәтелгән. Өфөлә ошо ваҡыт эсендә федераль һәм республика ҡаҙнаһынан 2 миллиард ярым һум аҡса бүленгән, мең ярымдан ашыу етем бала фатир менән тәьмин телгән. Быйыл дәүләттән - 434 миллион һум аҡса бүленгән. Әлеге ваҡытта 129 кеше өй туйлаған, йыл аҙағына тиклем тағы 45 кешегә фатир асҡысы тапшырыласаҡ.