Йыл да октябрҙең өсөнсө аҙнаһында Атайҙар көнө билдәләнә. Ошо уңайҙан бөгөн Өфөлә «Атайҙар аллеяһы» барлыҡҡа килде. Ике тиҫтәләп төп ағас Салауат Юлаев проспектында, СССР-ҙың 50 йыллығы урамы үткән участкала ултыртылды. Баш ҡаланы йәшелләндереү акцияһы Башҡортостандың «Ирҙәр ҡоро» төбәк йәмәғәт ойошмаһы тарафынан тормошҡа ашырылды. Аллея урыны ландшафт ҡаланың дизайны белгестәре тарафынан һайланған. Уны проектлауҙа биләмә үҙенсәлектәре, эстетик һәм уңайлы планлаштырыу ҡарарҙары иҫәпкә алынған.
Башҡортостандың «Ирҙәр ҡоро» төбәк йәмәғәт ойошмаһы тарафынан бындай саралар республика район-ҡалаларында даими үтә. Төп маҡсаты - йәмғиәттә атайҙарҙың ролен күтәреү, шулай уҡ ғаилә ҡиммәттәрен нығытыу. Тәбиғәткә һаҡсыл ҡараш та тәрбиәләнә.