Өфөлә күренекле йырсы һәм композитор Ғәзиз Әлмөхәмәтовтың тыуыуына 130 йыл тулыу айҡанлы хәтер кисәһе үтте. Әҙәби-музыкаль сара Мәжит Ғафуриҙың мемориаль йорт-музейында ойошторолдо
Бөйөк яҙыусы менән музыкант оҙаҡ йылдар дуҫ була. Тап бында улар Мәжит Ғафуриҙың поэмаһы буйынса ижад ителгән «Эшсе» операһы өҫтөндә эшләй. Ғәзиз Әлмөхәмәтов Башҡортостандың профессиональ музыка сәнғәтенә нигеҙ һалған төп фигураларҙың береһе була. Ижади эшмәкәрлегенән тыш, ул милли музыка мәктәбен үҫтереүҙә әүҙем ҡатнаша, талантлы йырсыларҙы тәрбиәләй.
Ғәзиз Әлмөхәмәтов-Башҡортостандың беренсе халыҡ йырсыһы ла. Ул башҡорт халыҡ йырҙарын тотош донъя кимәленә сығарған тәүге профессиональ башҡарыусы. Ғәзиз Сәлих улының яҙмышы фажиғәле тамамлана-сәйәси золом ҡорбаны мөһөрө тағыла. Йырсыны иҫкә алыу кисәһендә билдәле артистар маэстроның композицияларын башҡарҙы.