Халыҡтар берҙәмлеге көнө алдынан Башҡортостан милли музейында "Төркиҙәрҙең серле иле" күргәҙмәһе асылды. Үҙенсәлекле проектта музейҙың 1920 йылда Төркөстанға экспедиция һөҙөмтәһендә формалашҡан "көнсығыш" коллекцияһы тәҡдим ителә. Күргәҙмәгә Урта Азиянан килтерелгән 100-ҙән ашыу экспонат ҡуйылған. "Төркиҙәрҙең серле иле "күргәҙмәһенә килеүселәр һынлы сәнғәт һәм һөйәк япмалар менән биҙәлгән һарт эйәре, керамик һауыт-һаба, ебәк, мамыҡ туҡыма өлгөләре, бохара бәрхәте, киндергә һүрәт төшөрөү өсөн таҡталар, доға келәмдәре, ағас һырҙар, төрлө көнкүреш әйберҙәре, милли кейем элементтары менән таныша ала.
Күргәҙмәгә Георгий Гефель эштәренең музей коллекцияһына айырым иғтибар бүленгән. Экспедиция барышында яҙылған рәссамдың егерме өс акварель әҫәре - Башҡортостан милли музейында ғына һаҡланған һәм үткәндәге ғәжәйеп тарихтың шаһиты булған уникаль экспонаттар урын алған. Улар нейроселтәр ярҙамында йәнләндерелә.