Мифтахетдин Аҡмулла исемендәге Башҡорт дәүләт педагогия университеты ойошторған сара үҙ эсенә 10-дан ашыу конференция, осрашыу һәм түңәрәк өҫтәлде күҙ уңында тота. Форумдың иң абруйлы конференцияһы иҫәпләнгән «Аҡмулла уҡыуҙары» быйыл башҡорт телен донъя кимәленә сығарған шәхестәр Марат Зәйнуллин, Зиннур Ураҡсин һәм Данис Тикеевтың ғилми-педагогик эшмәкәрлегенә арналды.
Ойоштороусылар әйтеүенсә, «Аҡмулла уҡыуҙары»нда йыл һайын ҙур теләк менән Татарстан, Сыуаш, Алтай һәм Яҡут республикалары, шулай уҡ Ҡырғыҙстан, Ҡаҙағстан һәм Төркиә вәкилдәре ҡатнаша. Сығыш яһаусылар видеобәйләнеш аша ла ҡушыла. Быйыл улар 500-ҙән ашҡан. Тәҡдим ителгән фәнни тикшеренеү эштәре ике томлыҡ китапта донъя күрәсәк.