Өфө медицина колледжында хәҙер электрокардиографияны виртуаль ысынбарлыҡ күҙлектәре ярҙамында төшөрөргә мөмкин. Башҡортостан Хөкүмәтенең 30 миллион һумлыҡ грантына алынған ике оҫтаханала студенттар заманса ҡоролмаларҙа медицина ярҙамы күрһәтергә өйрәнә. Пациентты ҡабул итеү, анализға йүнәлтеү, диагноз ҡуйыу һәм дауалауҙарҙың барыһы ла ысын тормоштағы кеүек, тик буласаҡ медицина хеҙмәткәрҙәре генә кешелә түгел, ә программа буйынса эш итә. Ҡайһы бер манекендарҙа уҡыусылар махсус сигналдар ярҙамында аппендицит билдәләрен асыҡларға өйрәнә..
Һуңғы йылдарҙа республиканың урта махсус уҡыу йорттарында ике йөҙгә яҡын оҫтахана барлыҡҡа килде. Йыл һайын колледждарҙы модернизациялауға төбәк бюджетынан ярты миллиард һум аҡса бүленә. Радий Хәбиров уҡыу йорттары етәкселәрен хеҙмәт баҙары үҙгәрештәренә яуап бирерҙәй яңы һөнәрҙәргә өйрәтеү, белем биреү программаларын камиллаштырыуҙы көнүҙәк мәсьәләләрҙең береһе булыуын билдәләне. Шуға ла әлеге учреждение ла киләсәктә эште дауам итеп, уҡыу процесына яһалма интеллект индереү, шулай уҡ урта звено белгестәрен әҙерләү өсөн эш биреүселәр менән бәйләнеште нығытыуҙы күҙаллай.