Башҡортостандың урман фонды 100 процентҡа йыһан мониторингына алынған. Был төбәктең федераль урман хужалығы агентлығы менән системалы эш һөҙөмтәһе. Радий Хәбиров социаль селтәрҙәрҙә яҙыуынса, 2018 йылда урман фондының ни бары 6 проценты ғына спутник күҙәтеүендә булһа, бөгөн ул 5,7 миллион гектар тәшкил итә.
Былтыр ғына система урман ҡануниәтен боҙоуҙың 71 осрағын асыҡларға ярҙам иткән. Спутниктар барыһын да-рөхсәтһеҙ урман ҡырҡыусыларҙың эшен генә түгел, ә ҡуртымсылар яғынан ҡағиҙә боҙоуҙарҙы ла теркәй. Декларацияһыҙ эшләү, участкаларҙы үҙ белдегең менән биләү, ваҡыты үткән документтар менән эш итеү-барыһы ла ус төбөндәгеләй күренә. Һәр төрлө хоҡуҡ боҙоуҙарҙы кисекмәҫтән туҡтатасаҡбыҙ, ғәйеплеләр яуаплылыҡҡа тарттырыласаҡ, тип яҙған Башҡортостан башлығы.