Башҡортостан башлығы Радий Хәбиров Өфөнөң ашығыс медицина ярҙамы клиник дауаханаһының 2-се поликлиникаһы эшмәкәрлеге менән танышты. Медицина учреждениеһында төбәк программаһы буйынса капиталь ремонт уҙғарылып, яңы мебель һәм медицина ҡорамалдары, шул иҫәптән һанлы маммограф һатып алынған. Төҙөкләндереү эштәренән һуң бинала кабинеттар арттырылған, пациенттар уңайлығы өсөн ихтыяж менән файҙаланылғандары беренсе ҡатҡа күсерелгән. Поликлиникала 9 терапевт участкаһы, көндөҙгө стационар эшләй. Махсус хәрби операцияла ҡатнашыусыларға сифатлы медицина ярҙамы күрһәтеү буйынса ла өҫтәмә саралар күрелгән.
Төбәк башлығы поликлиниканың дауалау физкультураһы залын да ҡараны. Бында пациенттар реабилитацияһынан тыш, медицина учреждениеһы хеҙмәткәрҙәренең сәләмәтлеген нығытыу буйынса ла саралар күреләсәк. Шулай уҡ поликлиникала мөмкинлектәре сикләнгән кешеләр өсөн дә уңайлы мөхит булдырылған, медицина профилактикаһы бүлексәһе эшләй.