«Атайсал» проекты буйынса Шишмә районында ойошторолған «Ватан көсө» зональ форумында республиканың 12 муниципалитеты вәкилдәре үҙҙәрендә тормошҡа ашырылған башланғыстары менән уртаҡлашты.
Махсус хәрби операцияла ҡатнашыусыларға һәм уларҙың ғаиләләренә ярҙам, ауыл биләмәләрен төҙөкләндереү, ғаилә ҡиммәттәрен яҡлау, спорт һәм мәҙәни саралар уҙғарыу-проекттар төрлө өлкәләргә ҡағылды. Улар мәҙәниәт һарайы фойеһында «Яҡташтарҙың изге эштәре» видеосалонында ла күрһәтелде. «Атайсал» проекты Башҡортостан башлығы Радий Хәбиров башланғысында 2021 йылда старт алғайны, ошо ваҡыт эсендә ул халыҡ программаһына әйләнде, үҫеш юлын бөгөн дә дауам итә. Йәмғиәттең төп һорауы-берләшеү һәм изге ғәмәлдәр башҡарыуға йүнәлтелгән.
Сарала ҡатнашыусылар Хәрби дан мемориалына сәскә һалыуҙа ҡатнашты. Шулай уҡ тарих һәм тыуған яҡты өйрәнеү музейында «Атайсал. Тамырҙарҙы ҡайҙан табырға» тип исемләнгән оҫталыҡ дәресе уҙғарылды. Башҡортостандың милли архивы белгестәре ғаилә шәжәрәләрен тергеҙергә өйрәтте. Шулай уҡ «Ватанды һаҡлаусылар» дәүләт фонды филиалы менән Рәсәй халыҡтары ассамблеяһы тарафынан «Барыһы ла еңеү өсөн» майҙансығы ла ойошторолғайны.