Техник реабилитация сараһын һатып алыуға электрон сертификат. Мөмкинлектәре сикләнгән граждандар реабилитация йәки абилитация шәхси программаһы буйынса тормошон еңеләйтеүгә йүнәлтелгән ҡорамалдар һәм хеҙмәттәр менән тәьмин ителә ала. Дәүләт ярҙамы тураһында киләһе яҙма.
Өфөнән Рулай Аю 47 йыл шәкәр диабетынан яфалана, тап ошо сиргә бәйле күреү һәләтен дә юғалтҡан. Көн һайын иргә глюкометр ярҙамында ҡандағы шәкәр кимәлен үлсәп, контролдә тоторға тура килә.
Рулай Аю глюклометрҙы алыр алдынан табипта күҙҙәрен тикшерткән, унан һуң медицина-социаль экспертиза һөҙөмтәһендә дауалау һәм һауыҡтырыу программаһына тәҡдим ителгән техник реабилитация саралары билдәләнә. Глюкометр улар иҫәбендә була, дәүләт хеҙмәттәре порталы аша электрон сертификат алыуға ғариза тултырыла. Республика халыҡты социаль яҡлау үҙәгенән хәбәр итеүҙәренсә, мөмкинлектәре сикләнгән граждандарға ярҙам кимәле 52 мең һумға тиклем етә.
Ҡул таяғы, ишетеү аппараты, кресло-коляскалар һәм башҡа техник реабилитация сараларын һатып алғанда электрон сертификат менән файҙаланырға мөмкин. Әгәр талап ителгән сумма-тауар хаҡы билдәләнгән ярҙам күләменән күберәк икән, өҫтәп түләргә мөмкин. Мөмкинлектәре сикләнгән граждандар билдәләүенсә, дәүләт ярҙамына ихтыяж юғары, документтар йыйыу процессы уңайлы.
Гөлназ Хәйбуллина