Өфө районы Зубов ауылындағы типография льготалы лизинг ярҙамында сәнәғәт принтеры менән киң форматлы ламинатор һатып алып, етештерелгән продукция ассортиментын арттырған. Түбән процент ставкаһы һәм уңайлы түләү ваҡыты-эшҡыуарҙар «Минең бизнес» үҙәге аша дәүләт программаһы мөмкинлектәре менән танышып, документтар туплаған. Өс йыл элек ойошторолған компания реклама продукцияһын етештереүҙән тыш, канцелярия тауарҙарын һатыу менән дә шөғөлләнә.
Эшҡыуарҙар ҡорамалдарҙан тыш, махсус техника, йөк һәм туристик транспорт һатып алыуға ла льготалы лизинг алыу мөмкинлегенә эйә. Программа «Һөҙөмтәле һәм конкурентлы иҡтисад» милли проекты буйынса тормошҡа ашырыла. Йылдың тәүге биш айы һөҙөмтәләре буйынса төбәк лизинг компанияһы тарафынан 24 килешеү төҙөлгән, был, тәү сиратта, бәләкәй һәм урта бизнесҡа производство ҡеүәттәрен арттырырға булышлыҡ иткән.