Башҡорт спортсыһы йәнә донъя чемпионы! Ҡазанда көрәш буйынса 15-се донъя чемпионаты һәм беренселеге үтте. Ярыштарҙа 32 илдән 300-ҙән ашыу спортсы ҡатнашты. Ир-егеттәр һәм үҫмерҙәр 21 комплект миҙал өсөн көрәш алып барҙы. 80 килограмм ауырлыҡ үлсәмендә яҡташыбыҙ Артур Зөлҡәрнәев Рәсәйҙең берҙән-бер вәкиле булды. Әммә был уға турнир дауамында дәғүәселәренән өҫтөнлөк итеүгә ҡамасауламаны. Ул Финалда Әзербайжан спортсыһын еңде. Шулай итеп, Артур Зөлҡәрнәев бишенсе тапҡыр донъя чемпионы титулын яуланы. Артур бөгөн тормош иптәше Камилә менән яңы чемпиондар тәрбиәләй. Йәш ғаилә «Ауыл тренеры» программаһы буйынса Борай районында эшләй.
Донъя беренселегендә Башҡортостан вәкилдәре 7 тапҡыр пьедасталға күтәрелде. Илназ Зөбәйеров, Данис Хәкимов һәм Әнүәр Әхмәтғәлиев үҙ ауырлыҡ категорияларында еңеүсе булды. Бронза миҙалдарҙы Рәмил Хөсәйенов, Айназ Хәлиуллин, Искәндәр Арыҫланов һәм Илвир Иҙрисов яуланы.