Башҡортостандың Сәнәғәт, энергетика һәм инновациялар министрлығы яғыулыҡҡа бәйле мәғлүмәтте өс сәғәт һайын ала. Был хаҡта БСТ каналында уҙған бөгөнгө брифингта белдерҙеләр. Яуаплы белгестәр көн һайын республиканың төп телеканалында яғыулыҡ баҙарындағы һуңғы яңылыҡтар менән таныштыра. Водителдәрҙе борсоған һорауҙарҙың береһе Шаҡша биҫтәһендәге яғыулыҡ ҡойоу станцияларына ҡағылды. Ысынбарлыҡта улар нефть продукттары ҡабул итеп, ваҡытлыса ябылған булған. Әле барыһы ла эш режимында. Яғыулыҡ мәсьәләһе ашығыс ярҙам хеҙмәтенең эшенә йоғонто яһамаған. Был 500-гә яҡын машина, уларҙың һәр береһе тәүлек һайын кәмендә 250 километр юл үтә. бының өсөн яҡынса 40 литр яғыулыҡ талап ителә. Карталарға лимит ғәмәлдән сығарылған. Был категория водителдәре өсөн алгоритм яңыртылған.
Благовещен ҡалаһында катмарлы хәл аҙна башында күҙәтелгән, әле хәл тотороҡланған.
Өфө һәм Стәрлетамаҡ араһындағы Ауырғазы районы участкаһында ла проблемалар бар, унда бер генә заправкалау станцияһы эшләй. Мәсьәлә яҡын арала хәл ителә. Ырымбур өлкәһе менән сиктәш Мәләүез һәм Күмертауҙа ла хәл контролдә тотола.