Кушнаренко районы «Первушин» аэродромында «Асыҡ күк йөҙө» ХХ Бөтә Рәсәй авиация һөйөүселәр слеты башланды. Өс көн дауам итәсәк сарала эшлекле осрашыуҙар, оҫталыҡ дәрестәре, тамашасылар өсөн авиашоу ҡаралған. Форумды рәсми асыу тантанаһынан БЮТ хәбәрсеһе Азат Ғәлиуллин репортажы.
Легендар һауа судноһы йәнә күк йөҙөнә уҡталырға йыйына. Уҙған быуаттың 20-се йылдарында төҙөлгән уҡыу самолеты Бөйөк Ватан һуғышы йылдарында лайыҡлы хәрби юл үтә. Уны бөгөн дә музей экспонаты тип кенә ҡабул итеп булмай, боронғо самолет сафта ҡала.
«Первушин» аэродромы йәнә авиация һөйөүселәрҙе бергә йыйҙы. 20-се тапҡыр уҙғарылған Бөтә Рәсәй юбилей слеты «Первушин» аэродромының 15 йыллығына арналған сараларҙы ла үҙ эсенә алған.
Көн дауамында аэродромға Рәсәйҙең төрлө төбәктәренән тыш, яҡын сит илдәрҙән дә махсус ҡунаҡтар йыйылды. Ҡаҙағстан пилоттары мәҫәлән, Башҡортостанда үткән сараларҙа даими сығыш яһай. Улар өсөн бындай осрашыуҙар тәжрибә уртаҡлашыу майҙансығы ла.
Азат Ғәлиуллин