Өфө фән һәм технологиялар университетының «Ирәндек» халыҡ бейеүҙәре ансамбле яңы ижад миҙлеген ҡаршы алырға әҙерләнә. Әйткәндәй, күптән түгел ижади коллектив 55 йыллыҡ юбилейын билдәләне. Ансамбль 70-се йылдарҙа БАССР-ҙың атҡаҙанған артисы Екатерина Варламова тарафынан ойошторола. Ул художество етәксеһе булараҡ студенттарҙы хореография оҫталығына өйрәтә башлай. «Ирәндек» ысын мәғәнәһендә халыҡ бейеүҙәренә, башҡорт мәҙәниәтенә һөйөү тәрбиәләү мәктәбенә әйләнә. Юҡҡа ғына, Башҡортостандың атҡаҙанған халыҡ ижады коллективы исемен йөрөтмәй.
«Ирәндек»-Башҡортостандың билдәле бейеү коллективтарынан һанала. Студенттар бөгөн дә Бөтә Рәсәй конкурстарынан тыш, сит илдәрҙә лә сығыш яһап, башҡорт халыҡ бейеүҙәре, бай репертуары менән төрлө сәхнә тамашасыһын таң ҡалдыра.