Төбәктең Сауҙа-сәнәғәт палатаһы тарафынан уҙғарылған эшлекле сарала иҡтисадтың мөһим тармаҡтары буйынса берҙәм проекттар тормошҡа ашырыу мөмкинлектәре ҡаралды. Үзбәкстандан килгән йөҙҙән ашыу предприятие вәкилдәре B2B форматындағы һөйләшеүҙәрҙә ҡатнашып, Башҡортостандан яңы партнерҙар тапты, килешеүҙәр төҙөнө. Өфөлә Үзбәкстандың сауҙа йортон асыу ҙа ҡаралған. Бизнес-форум һөҙөмтәләре менән БЮТ хәбәрсеһе Гөлназ Хәйбуллина таныштыра.
Башҡорт-үзбәк бизнес-форумына Үзбәкстандан ҙур делегация саҡырылған. Аҙыҡ-түлек һәм еңел сәнәғәт, медицина компаниялары вәкилдәре лә, мебель, төҙөлөш материалдары етештереүселәр ҙә килгән. Ҡунаҡтарҙы Башҡортостан башлығы исеменән Хөкүмәт премьер-министры урынбаҫары-сәнәғәт, энергетика һәм инновациялар министры Александр Шельдяев сәләмләне.
Быйыл Ташкентта үткән «Иннопром»да ғына республика предприятиелары менән дөйөм алғанда 2 млрд 800 миллион һумға тышҡы иҡтисади килешеүҙәр төҙөлгәйне. Тауар әйләнешенең йылдан-йыл артыуы күҙәтелә. Үзбәкстандың Сауҙа-сәнәғәт палатаһы етәкселеге билдәләүенсә, Башҡортостандың көслө яҡтары барыһына ла мәғлүм. Рәсәйҙең нефть эшкәртеү сәнәғәте һәм нефть химияһы үҙәктәренең береһе. Машиналар төҙөлөшөндә лә уңыштарға ирешелгән. «Был йүнәлештәр буйынса тәжрибә уртаҡлашыу айырыуса мөһим»,- тине ул үҙ сығышында.
Үзбәкстан һәм Башҡортостандың эре предприятиелары араһында битуби форматындағы осрашыуҙарҙың уҙғарылыуы ла иҡтисади бәйләнештәрҙе нығытыуҙа үҫеш нөктәләрен билдәләргә ярҙам итә. Сараның төп маҡсаты-сәнәғәт кооперацияһын киңәйтеү һәм берлектәге проекттарҙы тормошҡа ашырыу өсөн яңы партнерҙар табыу.
Эшлекле һөйләшеүҙәр өҫтәленә боронғо рецепт буйынса әҙерләнгән ташкент былауы ла ҡуйылды. Үзбәкстан компанияһы консерваланған продукцияны ун беренсе йыл етештерә, Рәсәй баҙарына ла сыҡҡан. Әлегә былауҙы Мәскәү сауҙа нөктәләрендә күрергә мөмкин, тиҙҙән ул Башкортостан магазин кәштәләренә лә ҡуйылыуы ла ихтимал.
Ә бына Башҡортостан башҡорт балын экспортҡа сығарырға йыйына. Шул уҡ ваҡытта Үзбәкстан умартасылыҡта заман технологиялары менән уртаҡлашыу, берҙәм эшләү яҡлы.
Башҡортостанда ойошторолған бизнес-форумда Үзбәкстан делегацияһы республиканың төрлө министрлыҡ-ведомство етәкселеге менән эшлекле һөйләшеүҙәр алып барҙы. Осрашыуҙа республиканың ауыл хужалығын үҫтереү буйынса ҡыҙыҡлы тәҡдимдәр яңғыраны. Әйткәндәй, «Алға» айырым иҡтисади биләмәһендә һыуытҡыстар производствоһы буйынса завод төҙөлөшө лә планлаштырылған. Проектты тормошҡа ашырыуға ер бүленгән, финанс мәсьәләләр хәл ителә.
Гөлназ Хәйбуллина