Ике офистан алып бөтә республика буйлап асылған бүлексәләргә тиклемге юл. Башҡортостанда Күп функциялы үҙәккә нигеҙ һалыуға 15 йыл тулды. Был уңайҙан Радий Хәбиров ведомство хеҙмәткәрҙәренә ҡотлау һүҙҙәрен еткерҙе, уларҙың эше бик мөһим булыуын билдәләне. «Бер тәҙрә» принцибы арҡаһында халыҡҡа кәрәкле хеҙмәттәрҙе алыу өсөн күп инстанцияларға йөрөйһө түгел, барыһын да бер урында хәл итергә мөмкин. Хеҙмәттәр исемлеге лә йылдан-йыл тулылана. Шулай уҡ, юбилей айҡанлы төбәк тарихында тәүге тапҡыр «Күп функциялы үҙәктең атҡаҙанған хеҙмәткәре» тигән маҡтаулы исемдәр тапшырылды. Төбәктең күп функциялы үҙәктәре селтәрен үҫтереү буйынса сараларҙың һөҙөмтәлелеге федераль кимәлдә лә юғары баһалана. Йыл һайын тиерлек офистар Рәсәйҙең «Иң яҡшы Күп функциялы үҙәк» бөтә Рәсәй конкурсы лауреаттары исеменә лайыҡ була.