Яңы уҡыу йылы башланыуға һанаулы көндәр ҡала. Ата-әсәләр дәфтәр, форма һәм кансә тауарҙары һатып алыу менән мәшғүл. Көндәлек мәшәҡәттәр араһында табиптар баланың һаулығы тураһында ла хәстәрлек күрергә саҡыра. Һыу сәсәге айырыуса балалар коллективтарында әүҙем тарала, шуға күрә вакцинация үтергә кәңәш ителә. Теманың дауамы БЮТ хәбәрсеһе Әлфинә Килдейәрова.
Һыу сәсәгенә ҡаршы вакцина яһатыр өсөн махсус әҙерлек кәрәкмәй. Ни бары теләк һәм вакцинаның булыуы шарт. Күптәр һыу сәсәген зыянһыҙ балалар ауырыуы тип иҫәпләй, әммә был яңылыш фекер, ти табиптар. Балаларҙа инфекция еңел формала үтһә, өлкәндәрҙә һәм иммунитеты ҡаҡшаған кешеләрҙә сир етди өҙлөгөүҙәргә килтереүе ихтимал. Өҫтәүенә, вирус бик йоғошло.
Яңы уҡыу миҙгеле алдынан табиптар балаларға һыу сәсәгенә ҡаршы прививка яһатып өлгөрөргә саҡыра. Был турала ике бала әсәһе Элина алдан хәстәрлек күргән. Ике йәшен тултырасаҡ улы Радмир яҡын арала балалар баҡсаһына йөрөй башлаясаҡ. Прививканың тәүге дозаһын йәй башында яһатҡандар, барыһы ла яҡшы үтте, ти йәш әсә.
Мәктәпкә һәм балалар баҡсаһына әҙерлек кансә тауараҙры, форма һатып алыу ғына түгел. Һаулыҡты һаҡлау мөһим. Был балаға уҡыу йылын ышаныслы башларға һәм мөһим тәүге аҙналарҙы ҡалдырмаҫҡа ярҙам итәсәк.
Бала саҡта ауырып та, һыу сәсәге менән өлкән йәштә лә йәнә осрашырға мөмкин. Бындай кешеләр, эске көсөргәнеш кеүек төрлө факторҙарҙы иҫәпкә алып, йыш осраҡта сирҙе ҡатмарлыраҡ үткәреүҙәре ихтимал.
Әлфинә Килдейәрова