Хабаровск крайында өс көнгә матәм иғлан ителде. «Холдоми» лагерында янғында дүрт бала һәләк булғандан һуң ил буйынса ял һәм һауыҡтырыу базаларына иғтибар артты. Рәсәй мәғариф министрлығы мәғлүмәттәренә ярашлы, палаткалы лагерҙарҙа йылына өс йөҙ меңгә яҡын бала ял итә, күңелһеҙ осраҡтан һуң ғына бындай урындарҙа хәүефһеҙлек сараларының нисек ойошторолорға тейешлеге аныҡ билдәләнмәүе асыҡланды. Күҙәтеүсе органдар Башҡортостанда ла өҫтәмә тикшереүҙәр башланы. Хәбәрсебеҙ Гөлназ Хәйбуллина дауам итә.
Һанаулы минуттар эсендә палаткалар көл-күмергә әйләнә. Хабаровский крайында дүрт баланың һәләк булыуына бәйле лагерь етәкселегенә ҡарата енәйәт эше ҡуҙғатылған. Оло юғалтыу кисергән ата-әсәләргә берәр миллион һум компенсация түләнәсәк. Төбәктә бөгөн матәм башланды. Билдәле булыуынса, ут сығыу тураһында һуңлап хәбәр ителә. Янғынға палатка эсендәге йылытҡыс ҡоролмаһы сәбәпсе булыуы ихтимал. Балалар унда кейемдәрен киптергән.
Республикала бөгөн ҡырҡҡа яҡын ял һәм һауыҡтырыу лагеры эшләй, уларҙың дүртәүһендә балаларҙы палаткаларҙа йәшәтеү ойошторолған. Өфө районындағы "Ҡайынҡай" учреждениеһы етәкселеге лә киләһе сменаны тап тәбиғәт ҡосағында уҙғарырға ниәтләгән була. Әммә һауа торошоноң тотороҡһоҙлоғо һәм "Холдоми" лагерындағы күңелһеҙ осраҡҡа бәйле ял итеүселәрҙе корпустарҙа ҡалдырыу ҡарары ҡабул ителә.
Күҙәтеүсе органдар тарафынан балалар һауыҡтырыу лагерҙарына иғтибар ҙа артты, урында өҫтәмә тикшереүҙәр ойошторола. Үҫеп килгән быуынға янғын хәүефһеҙлегенә бәйле аңлатыу эштәре алып барыла. Өфө районында ун биш ял учреждениеһы иҫәпләнә, уларҙың биләмәләрендә палаткалар ҡуйылмауы билдәләнде.
Нисек кенә булмаһын, «Холдоми» лагерындағы осраҡтан һуң тап Ғәҙәттән тыш хәлдәр министрлығы бүлеге етәксеһе эшенә һалҡын ҡарауға бәйле ҡулға алына. Тимәк, тәү ҡарашҡа, бәләкәй генә етешһеҙлек тә оло бәләгә килтереүе ихтимал. Тикшереүсе органдар иңендә ҙур яуаплылыҡ. Әйткәндәй, уҡыу миҙгеле лә яҡынлаша. Быға бәйле, Башҡортостандың юл инспекторҙары лагерҙарҙа әңгәмәләр ойоштороп, хәүефһеҙлек ҡағиҙәләрен иҫкәртә. Алдағы ярты йыллыҡта ғына төбәктә балалар ҡатнашлығында 175 юл-транспорт ваҡиғаһы теркәлә, уларҙа туғыҙ баланың ғүмере өҙөлә.
Йәйге ял күңелле, бәлә-ҡазаһыҙ үтһен өсөн хәүефһеҙлек талаптарының үтәлеүе шарт. Белгестәр билдәләүенсә, Хабаровкиҙағы күңелһеҙ осраҡтан һуң палаткалы лагерҙарҙы янғын сығыуҙы иҫкәртеүсе ҡоролмалар менән тәьмин итеү бурысы ҡуйылыуы ихтимал. Бынан тыш, ялды ойоштороуға бәйле ҡағиҙәләр ҙә көсәйтеләсәк.
