Башҡортостан Башлығы һәм Дәүләт Йыйылышы -Ҡоролтайҙың айырым округтарына ойоштороласаҡ һайлауға өс миллиондан ашыу бюллетень әҙерләнгән, уларҙың дүрттән бер өлөшө өфөләргә тәғәйенләнгән. Бөгөн Благовар районының «Белая река» нәшриәтенән бланктар территориаль комиссияларға оҙатыла башланы. 6 сентябрҙә улар участкалар буйынса бүленәсәк. Шулай уҡ урында ҡулланыуға яраҡһыҙ, артыҡ тип табылған бюллетендәр, уларҙы баҫтырыу формалары ла юҡ ителде. БСТ каналы хәбәрсеһе Гөлназ Хәйбуллина дауам итә.
Типографияларҙа баҫтырылған ун меңгә яҡын һайлау бюллетене ҡулланыуға яраҡһыҙ тип табылған. Башҡортостандың Үҙәк һайлау комиссияһының эшсе төркөмө тарафынан был бланктарҙы юҡ итеү бурысы ҡуйыла. Бер нисә өлөшкә бүлеп ҡырҡылған ҡағыҙ ҡалдыҡтары артабан икенсел эшкәртеүгә ебәреләсәк. Бюллетендәрҙе баҫтырыу формаларының да хәҙер кәрәге юҡ.
Ҡыҫҡыс ярҙамында махсус формалар ҙа бер нисә минут эсендә утилләштерелде. Был алым һәр һайлау алдынан башҡарыла. Эш процессы тамамланғандан һуң ғына Өфө һәм Благоварҙағы типографияларҙа заказ буйынса баҫтырылған бюллетендәр район-ҡалаларға оҙатыла башлай, уларҙы ҡабул итеү-тапшырыу акттары тултырыла. Әйткәндәй, быйыл башҡорт, рус һәм татар телдәрендә өс миллиондан ашыу бланк әҙерләнгән.
Район-ҡалаларға бүленгән ҡаптарҙың үлсәмдәре төрлөсә. Был урындарҙа һайлаусылар һанына бәйле. Әйтәйек, Межгорьела буласаҡ республика башлығы өсөн ун өс меңгә яҡын кеше тауыш бирәсәк. Ҡалала тулыһынса КОИБтар, йәғни бюллетендәрҙе комплекслы эшкәртеү ҡоролмалары ҡулланыла.
Тәүге бюллетендәр Урал аръяғы райондарына оҙатылды. «Махсус бәйләнеш» предприятиеһының йөк машиналары территориаль һайлау комиссияларына юлланды. Һайлау көнө алдынан бланктар участкалар буйынса таратыласаҡ.
Типографияларҙа бюллетендәрҙе әҙерләү бер ай дауам иткән. Быйыл өҫтәмә һаҡ сараһы булараҡ микрошрифт менән яҙыуҙар ҡулланылған. Һайлау көнө бланктар менән һәр кем таныша ала. Участкалар иртәнге сәғәт 7-нән алып киске сәғәт 9-ға тиклем эшләйәсәк. Теркәү урынынан ситтә тауыш бирергә теләүселәр 4 сентябргә тиклем территориаль һайлау комиссиялары, күп функциялы үҙәктәргә мөрәжәғәт итеп ғариза яҙа ала. Шулай уҡ Дәүләт порталы аша ла уңайлы участканы билдәләргә мөмкин.
Башҡортостанда физик 256 меңдән ашыу мөмкинлеге сикләнгән кеше йәшәй, уларҙың ете меңендә күреү һәләте насар. Улар өсөн Өфө, Белорет, Бәләбәй һәм Стәрлетамаҡ ҡалаларында барлығы алты махсуслаштырылған участка эшләйәсәк. Урында һайлау тәртибе хаҡында мәғлүмәт дәфтәрҙәре Брайль шрифты менән яҙылған, инвалидтарға ирекмәндәр ҙә ярҙамға килергә әҙер. Белгестәр билдәләүенсә, быйыл һайлауға әҙерлек эше йәнле ойошторолған. Биналарҙа пандус, саҡырыу төймәләре һаны артҡан, уңайлы мөхит булдырылған. Мөһим сәйәси сарала күҙәтеүселәр ҙә күп ҡатнаша
