Завод ябыҡ, хеҙмәткәрҙәр түләүһеҙ ялда. Предприятиеның эш хаҡы түләү буйынса ғына 174 кеше алдында 11 миллион һумға яҡын бурысы йыйылған. БСТ каналы хәбәрсеһе Гөлназ Хәйбуллина дауам итә.
Дүртөйлө һөт ризыҡтары комбинатына улар хәҙер тимер ҡойма аша ғына ҡарай. Былтыр йәй аҙағынан предприятие эшселәренә хеҙмәт хаҡы түләү туҡтатыла. Берәүҙәр тешен ҡыҫып, тағы ла ике-өс ай бушҡа эшләп өлгөрә, аҡыллылар шунда уҡ түләүһеҙ отпускаға китә.
Ҡапыл эшһеҙ ҡалыу проблемалар өҫтәй. Бигерәк тә ипотека, кредиттары булғандар киҫкен хәлдә ҡалған, ғариза яҙып әлегә проценттарын ғына түләүселәр бар. Әйткәндәй, һөт комбинатының 174 хеҙмәткәр алдында эш хаҡы буйынса бурысы бар. Суммалары ғына төрлө. Берәүҙәр 20 мең һум өсөн көрәшһә, икенселәр 100 мең һумдан ашыу аҡсаһын ҡайтарырға теләй.
Заводҡа бөгөн индермәйҙәр. Рөхсәт юҡ. Шул уҡ ваҡытта һаҡ хеҙмәтендә туғыҙ кеше эшләй. Бушҡа. Улар ҙа ҡасандыр гөрләп торған предприятие эше тергеҙелер тип ышана.
Эш хаҡы буйынса киҫкен мәсьәлә барлыҡҡа килгәс тә, хеҙмәткәрҙәр район прокуратураһына ғариза яҙа. Осраҡ буйынса тәфтишселәр тикшереү ойоштора.
Дүртөйлө һөт ризыҡтары комбинаты «Башмилк» компаниялар төркөмөнә ҡарай. Эшҡыуар Александр Никитин билдәләүенсә, проблема башы - предприятиены финанслау мәсьәләһендә банк менән килешә алмауға бәйле барлыҡҡа килгән. Процент ставкалары күтәрелә, һөҙөмтәлә производство туҡтатыла.
Предприятие етәкселеге, власть органдарына ла ярҙам һорап мөрәжәғәт итә, инвестиция сәғәттәрендә ҡатнаша. Дүртөйлө һөт ризыҡтары комбинаты эшмәкәрлеге яңыртылырмы?! Инженер селтәрҙәргә бәйле әленән үк проблемалар барлыҡҡа килгән. Был видеояҙмаларҙан күренеүенсә, йылылыҡ системаһы эшлектән сыға, торбалар тишелә.
Дүртөйлө һөт ризыҡтары комбинатына күрше район-ҡалаларҙан килеп тә эшләүселәр булған. Хеҙмәткәрҙәр финанс проблемалар ваҡытлыса булыуына өмөтләнә. Завод эшмәкәрлеге яңыртылыу менән кире эшкә ҡайтырға йыйына
