Көтөлмәгән «йомартлыҡ». Иглин районында йәшәүсе Фәниә Бикмөхәмәтова 90 йәшлек юбилейына ил президентының ҡотлау хатынан тыш, бүләккә урындағы хакимиәттән сәй һәм кәнфит алғайны. Был осраҡ социаль селтәрҙәрҙә, матбуғат сараларында ҙур резонанс тыуҙырҙы. Асыҡланыуынса, Аҡбирҙе ауылы хакимиәте хеҙмәткәренең изге ниәте аңлашылмаусанлыҡтар менән ҡабул ителә. Хәйер, юбиляр ҙа был хәлгә йылмайып ҡына ҡарай. БСТ каналы Хәбәрсеһе Гөлназ Хәйбуллина дауам итә.
Ҡулдарында сағыу гөлләмә, битендә шатлыҡлы күҙ йәштәре. Фәниә Бикмөхәмәтова сираттағы юбилейын балалары, яҡын туғандары менән бергә ҡаршылай. Ыҡсым өйҙә уларҙың барыһына ла урын етерлек. Өҫтәл тулы һый-хөрмәт... Етемлектең әсе елен, һуғыштың аслыҡ-яланғаслыҡ йылдарын кисергән ханым йәнә хәтирәләргә бирелә. Юғалған бала һәм үҫмер саҡтар, ауыр ер эше, мохтажлыҡ.
Ата-әсәйһеҙ ҡалғас, Фәниә Шәрифйән ҡыҙы ике һеңлеһе менән өләсәһе ҡарауында ҡала, баҫыу эшен бергәләп башҡаралар. Фәриҙә Шәмсетдинова апаһына һәр ваҡыт терәк булырға тырыша. Үгеҙ егеп утын ташыу, ер һөрөү – иң ҙур һынауға әйләнә.
Фәниә Бикмөхәмәтова ун дүрт йәшендә үҙенә тағы бер йәш өҫтәтеп Свердловск өлкәһенә торф сығарырға бара. Тыуған ауылына ҡайтҡас, ҡырҡ йылға яҡын колхозда һауынсы булып эшләй. Хаҡлы ялда ла ер эшенән айырылмай, баҡсасылыҡ менән шөғөлләнә, йорто ла гөл сәскәгә тулған. Тормош иптәше менән бергә ул алты ҡыҙында ла хеҙмәткә һөйөү тәрбиәләй.
Тыл һәм хеҙмәт ветераны Фәниә Бикмөхәмәтова нәҫелендә йөҙйәшәрҙәр ҙә күп, шуға һуғыш йылдарында сынығып үҫкән ханым киләсәккә өмөт менән ҡарай. Ейән-ейәнсәрҙәре, бүләләре менән осрашыуҙарҙан һуң үҙен йәшәреп ҡалғандай хис итә. Уртаҡлашыр хәтирәләр күп, шуға сал сәсле ханым яҡындарын һәр ваҡыт тулҡынланып көтөп ала.
