Салауат ҡалаһында медицина хеҙмәткәрҙәре пациенттың вафат булыуын туғандарына хәбәр итмәгән. Исемһеҙ килеш Өфө мәйетханаһында ятҡан. 65 йәшлек ирҙең тормош иптәше һәм ҡыҙы үҙизоляцияла ҡала, ә медицина учреждениеһы телефондарға яуап бирмәй. Ике аҙна самаһы яҡындарының хәлен белә алмай аҙаплана. БСТ каналы хәбәрсеһе Азат Ғәлиуллин дауам итә.
Елена Кальченконың атаһы ауыр хәлдә Салауат ҡалаһының ковид-госпиталенә эләгә. Һаҡланыу костюмындағы хеҙмәткәрҙәр пациенттың документтары менән бергә, бәйләнеш өсөн телефон һандарын яҙып алалар. 1-се төркөм инвалиды, өҫтәүенә, йыл башынан түшәктә ятҡанға күрә, икенсе көнөнә үк махсус матрас килтерелә.
Бәйләнеш тик бер аҙна самаһы ваҡыт үткәс кенә булдырыла. Медицина хеҙмәткәрҙәре пациенттың госпиталдән сығыуын хәбәр итә. Елена Кальченко түшәктә ятҡан аталарының ярҙамһыҙ ҡайта алмауын белдереп, ҡабат-ҡабат төбәшеп һорашҡас телефонды госпиталь мөдире ала.
Салауат ҡала дауаханаһы ковид-госпиталенә пациент смена алышынған көндә эләгеүен билдәләй. Шуға ла, бәйләнеш өсөн телефон һандарының юғалыуы ла ихтимал.
Ике аҙна самаһы билдәһеҙлекте Елена кисерә алмай. Ғәҙеллек талап итеп Прокуратураға мөрәжәғәт иткән.
Азат Ғәлиуллин.
