Һуңғы арала Дәүләт Думаһына тәү ҡарашҡа сәйер ҙә, ҡыҙыҡ та тәҡдимдәр индерелә. Мәҫәлән, вице-премьер Александр Хлопонин фекеренсә, саңғы миҙгеленә тап килһен, ғаиләләр тау саңғыһы курорттарында ял итеүҙе планлаштыра алһын өсөн Рәсәйҙә ҡышҡы мәктәп каникулдарының һығылмалы графигын индерергә кәрәк.
Уныңса, бындай саралар Төньяҡ Кавказда туристик тау саңғыһы курорттарын үҫтереү өсөн мөһим. Вице-премьер Европа илдәре тәжрибәһен миҫал итеп ҡуя: унда властар ҡышҡы мәктәп каникулдарын Альп тауҙарында ҡар яуған мәлгә тура килтерә.
Ростуризм мәғлүмәте буйынса, 2017 йылда ил эсендә рәсәйҙәрҙең сәйәхәттәр һаны 3% артҡан, йәғни 56,5 миллиондан ашып киткән. Был 2014 йылға ҡарағанда 34% күберәк һәм 2013 йылғы күрһәткестән 75% юғары.
Иң популяр йүнәлештәр иҫәбендә — Мәскәү, Санкт-Петербург, Краснодар крайы, Ҡырым, Татарстан, Чечен республикалары һәм Мурманск өлкәһе.
