Республикала бәләкәй һәм урта эшҡыуарлыҡ субъекттарына махсус займдар бирелә башланы. Ниндәй ставкалар һәм кемдәр дәғүә итә ала микрозаймдарға? БСТ каналы хәбәрсеһе Рафиҡ Әхмәтшин ҡыҙыҡһынды.
Әхмәт Харрасов етәкләгән төҙөлөш ойошмаһы дәүләт подрядтарында эшләй. Бәләкәй эшҡыуарлыҡ субъекты йыш ҡына ремонт, биләмәләрҙе төҙөкләндереү эштәренә йәлеп ителә. Иҫәпләшеүҙәр үтәлгән эш акттары нигеҙендә башҡарылыу сәбәпле, йыш ҡына аҡсаға ҡытлыҡ тойола. Шуға ла кредитлауға ихтыияж бар. Коммерция банктарының процент ставкалары юғары.
Пандемияға бәйле, илдәге иҡтисади йәнлелек кәмегән осорҙа дәүләт бәләкәй һәм урта эшҡыуарлыҡҡа ярҙам ҡулы һуҙа. Бигерәк тә эште башлаған осорҙа микрокредит юлларға мөмкин. Әммә халыҡты бурыс һаҙлығына батырған микрофинанс ойошмалары менән бутарға ярамай. Йүнселдәргә аҡса киреһенсә, түбән проценттар менән бирелә.
Башҡортостандың бәләкәй һәм урта эшҡыуарлыҡты үҫтереү агентлығынан хәбәр итеүҙәренсә, микрокредит юллап, ыңғай яуап алыуға, тәү сиратта тауар етештереү һәм халыҡҡа хеҙмәттәр күрһәтеүҙе яйҙа һалған предприятиелар дәғүә итә ала. Белгестәр, фекеренсә, ҡатмарлы иҡтисади шарттарҙа халыҡҡа эш урындары булдырыу шарт.
Рафиҡ Әхмәтшин.
