Башҡортостанда «Яңы йылдың ғаилә уйындары» дауам итә.
Республика район-ҡалаларынан был ярышта 50 меңдән ашыу кеше ҡатнашырға теләк белдергән. Мәктәп яны спорт майҙансыҡтарында ғаиләләр етеҙлектә һәм тиҙлектә көс һынашты. Йылыныу өсөн мотлаҡ күнегеүҙәр эшләгәндән һуң, балалар һәм ата-әсәләрҙән торған командалар сәкән һуғыу, пассажирҙар тейәлгән тюбинг менән идара итеү маһирлығын күрһәтте.
Уйындарҙы Мәғариф һәм фән министрлығы, Спорт һәм йәштәр сәйәсәте министрлығы һәм «Берҙәм Рәсәй» партияһының төбәк ойошмаһы берлектә ойошторған. Фирҡәнең төбәк башҡарма комитеты етәксеһе Рөстәм Әхмәҙинуров 25-cе белем биреү усағына ярышта ҡатнашыусыларҙы дәртләндереү өсөн килгән. Былтыр «Яңы йылдың ғаилә уйындары» мәктәп спорт залдарында үткәрелһә, быйыл уларҙы саф һауала ойошторорға ҡара ителгән.
Гүзәл Борханова.
