Уның барышында мәктәп автобустарын хеҙмәтләндереү, юл билдәләре һәм балалар хәүефһеҙлеге мәсьәләләрен хәл итеү мөмкинлеге асыҡланды. Был хаҡта тулыраҡ киләһе яҙмала.
Нуғай ҡасабаһының 147-се мәктәбендә дәрестәр тамам. Тирә-яҡ ҡасабаларҙа һәм микрорайондарҙа йәшәгән уҡыусылар мәктәп автобусын көтә. Оҙаҡ та үтмәй балалар тигән махсус билдә ҡуйылған автобустар уҡыусыларға килеп тә етә.
Юл боролоштарында ҡар өйөмдәре күренеште ҡаплай, ҡаршы һыҙаттан хәрәкәт иткән транспортҡа уңайһыҙлыҡ тыуҙыра. Мәктәп автобусынан төшкән бәләкәй пассажирҙар ҡар өйөмдәре аша, ҡаршыға килгән транспорт алдынан үтергә мәжбүр була.
Нуғай ҡасабаһы урамдарында йәйәүлеләргә тротуарҙар ҡаралмаған. Ә ҡыш ҡар күп яуған осорҙа автомобиль йөрөгән урамдар ғәҙәттәгенән тарая, транспорт һәм йәйәүлеләр хәрәкәтенә ҡамасаулай.
Юл торошона Октябрь районы хакимиәте башлығының алыҫ биләмәләр менән эшләү бүлеге етәксеһе аңлатмаһы:
Баш ҡаланың Октябрь районында барлығы утыҙ туҡталыш урынлаштырылған. Микрорайондар йылдам үҫешкәс, яңыларын ҡуйыу ҙа көн ҡаҙағында. Нуғай, Жилин һәм Зинин ҡасабаһы юлдарында тәртип булдырыу, транспорт хәрәкәтенә уңайлыҡтар өсөн йәйәүлеләргә тротуарҙар төҙөү проекты ла яҡын киләсәктә ыңғай хәл ителер тип күҙаллана.
Гүзәл Борханова
