Федераль ведомство етәксеһе баш ҡалала социаль объекттар эшмәкәрлеге менән танышты. Тәүҙә ул Өфөлә күптән түгел генә эш башлаған «Ритм» үҙәгенә барҙы. Был учреждениела мөмкинлектәре сикләнгән балалар һөнәр үҙләштерә, оло тормошҡа аяҡ баҫырға өйрәнә. Социаль үҙәккә көн дә егерменән ашыу бала йөрөй. Һуңынан уларҙы эш урындары менән тәьмин итеү ҙә ойошторолған. Яҡын арала Башҡортостанда тағы ошондай 30 учреждение асыу ҡарала.
Алексей Вовченко мөмкинлектәре сикләнгән балалар һәм үҫмерҙәрҙе реабилитациялау үҙәге эшмәкәрлеге менән дә танышты. Бында балаларға ун һигеҙ йәшкә тиклем психолог, социаль педагог һәм медицина ярҙамы күрһәтелә. Шулай уҡ инвалид бала тәрбиәләүсе ата-әсәләр ҙә оҫталыҡ дәрестәре ала. Әле «Салют» шифаханаһында яңы корпустар төҙөлә. Реабилитация шарттарын арттырыу мөмкинлеге биргән социаль үҙәк 2022 йылда сафҡа инәсәк.
Айнур Кәбиров
