Республика башлығы Радий Хәбиров Рәсәй хеҙмәт һәм халыҡты социаль яҡлау министры урынбаҫары Алексей Вовченко менән осрашты. Һөйләшеүҙә Өфөлә “Именлек” республика геронтология үҙәге һәм Благовещенскиҙа ҡарттар өсөн торлаҡ комплексы төҙөү мөмкинлектәре ҡаралды. Төбәк етәксеһе әйтеүенсә, Башҡортостан был әһәмиәтле социаль объекттар төҙөү өсөн финанс һорап федераль органдарға тейешле документтар ебәргән. Бынан тыш республикала ауыр хәлгә тарыған халыҡтың мәсьәләләрен комплекслы һәм системалы рәүештә хәл итеү буйынса Стратегик инициативалар агентлығы проекты һынау тота. Уға ярашлы кешенең проблемалары, ниндәй ярҙам кәрәклеге өйрәнелә, һуңынан уның мәсьәләләрен хәл итеү буйынса алгоритм булдырыла.
