Төкәтмә булараҡ төҙөлгән оҫтаханала асҡыстарҙың дубликаты эшләнгән, аяҡ кейемдәре ремонтҡа алынған. Рөхсәт ҡағыҙҙарһыҙ бизнес ойоштороусыға «Берҙәм Рәсәй» партияһының «Хәүефһеҙ республика» проекты активистары юлыҡты. Әңгәмә барышында эшҡыуар был аҙымға уны ғаиләһенең ауыр финанс хәле этәреүен билдәләне. Өфөлә ғаиләһе менән ҡуртымға фатир алып йәшәй, дүрт бала үҫтерә.
Сауҙа нөктәләре буйынса мониторинг уҙғарыусылар киоск адресы буйынса хоҡуҡ һағындағыларҙы саҡырҙы. Туҡталыштағы законһыҙ төкәтмәне һүтеү мәсьәләһе ҡараласаҡ. Шул уҡ ваҡытта йәшерен рәүештә эшҡыуарлыҡ менән шөғөлләнеүсе ир енәйәти яуаплылыҡҡа ла тарттырылыуы ихтимал.
Гөлназ Хәйбуллина
