Һаулыҡ һаҡлау министрлығынан хәбәр итеүҙәренсә, медицина учреждениеларына бөжәк ҡаҙалған 124 кеше мөрәжәғәт иткән. Тәбиғәткә ял итергә сыҡҡанда, яҡшылап кейенергә кәрәк. “Бөжәктәр ағаста була тип уйлаусылар яңлыша”, - ти биологик фәндәре кандидаты Дилбәр Ҡыуатова.
“Талпандан кешегә бер нисә ауырыу йоғоуы ихтимал”, - ти медицина фәндәре докторы, профессор Марсель Тойғонов.
Бөжәктең зарарлымы, юҡмы икәнлеге Гигиена һәм эпидемиология үҙәгендә тикшерелә. Адресы: Өфө ҡалаһы, Шәфиев урамы, 7-се йорт. Анализ һөҙөмтәһен сайтта ҡарарға була. Республика клиник йоғошло ауырыуҙар дауаханаһы баш табибы Азат Мөхәмәтйәнов белдереүенсә, республикала йәшәүселәрҙең – 30, Өфө халҡының 15 проценты талпан энцефалитынан вакцина яһатҡан. Быйыл Башҡортостанға 55 мең дана самаһы прививка килтерелгән.
