Башҡортостандың транспорт һәм юл хужалығы министры вазифаһын башҡарыусы ошондай тәҡдим индерҙе. Юғиһә, автомобиле эвакуацияланған водителдәр өс тапҡыр яуап тота. Ҡағиҙә боҙған өсөн штраф, эвакуатор хеҙмәте һәм туҡталҡала торған өсөн дә хаҡ түләргә кәрәк.
Райондарҙан килгәндәр өсөн был аҡсалар үтә ҙур, тине Виктор Жульков. Автомобилдәрҙе эвакуациялау мәсьәләләре бөгөн Дәүләт Йыйылышы-Ҡоролтай депутаттары һәм яуаплы ведомство вәкилдәре ҡатнашлығында үткән түңәрәк өҫтәлдә тикшерелде.
Эргәлә камералар булғанда ғына эвакуаторҙар бар ҡағиҙәләрҙе теүәл үтәп, яйлап эш итә. Ғәҙәти эш мәленә уларҙың формула ярыштарындағы пит стоп хеҙмәтләндереүселәр ҙә көнләшерлек. Күҙ асып йомған арала еңел автомобиль ҙурырағына атланып та ала. Машинаның хужаһы сығып өлгөрмәһен өсөн инспектор менән эвакатор водителе мөғжизә ҡылырға әҙер. Ярамаған урында туҡтаған был «Нива» ла хужаһын көтөп тормаҫҡа булды.
Ҡайҙалыр түгел, ә Оло Шерстомойная урамына. Күптән түгел генә штраф туҡталҡаһы Пархоменко урамынан Нижегородка биҫтәһенә күсерелде. Йәнәһе лә, шулай уңайлы. Әммә автомобилһеҙ тороп ҡалған водителдәргә генә уңайлы түгел. Машинаһын эҙләп ҡала ситенә йөрөгәнсе ваҡыт үтә. Ә ваҡыт был туҡталҡала үтә лә ҡиммәт.
Бигерәк тә райондарҙан килгән халыҡтың кеҫәһенә был эвакуаторҙар ныҡ һуға. Дауаханалар янында урын таба алмай биш минутҡа ғына машинаһын ҡалдырып киткән водителдәр өсөн тотош бер көн квестҡа әйләнә.
Әгәр штраф туҡталҡаһында эшләгән инспекторҙың эш ваҡыты тамамланыуға тиклем машинаңды табып өлгөрмәһәң, тағы бер тәүлек көтөргә тура килә. Ул сағында инде ҡағиҙә боҙған өсөн штраф һәм эвакуатор хеҙмәтенән тыш, автомобиль һаҡта торған өсөн 1200 һум түләргә мәжбүр итәләр.
Был ҡаршылыҡтарҙы йомшартыу юлдары депутаттар ойошторған түңәрәк өҫтәлдә өйрәнелде. Халыҡ һайланыусылар әйтеүенсә, штраф туҡталҡаһының беренсе тәүлеге түләүһеҙ булырға тейеш. Йәки сит илдәрҙәге кеүек автомобилдәрҙе алып китергә түгел, ә тәгәрмәстәргә блокираторҙар ҡуйыу кәрәк. Әлеге мәлдә штраф туҡталҡаһы тәртип булдырыу түгел, ә эшҡыуарлыҡты ғына хәтерләтә. Өҫтәүенә, эвакуатор һәм туҡталҡа өсөн тарифтарҙы арттырыу көтөлә.
Айнур Кәбиров
