Бөгөн Башҡортостан Хөкүмәтендә ойошторолған түңәрәк өҫтәл ошо темаға арналды.
Сара Хөкүмәт Премьер-министры урынбаҫары Азат Бадранов рәйеслегендә уҙҙы. Унда Дәүләт Йыйылышы-Ҡоролтай, Башҡортостан мәғариф министрлығы, Прокуратура, Өфө ҡала хакимиәте, Ата-әсәләр комитеты вәкилдәре ҡатнашты. Фекер алышыу барышында белем усаҡтарында тел сәйәсәтен тормошҡа ашырыу менән бәйле көнүҙәк мәсьәләләр тикшерелде, уларҙы хәл итеү юлдары барланды.
Белгестәр әйтеүенсә, ыңғай һөҙөмтәгә килешеп, эҙмә-эҙлекле эш алып барғанда ғына өлгәшергә мөмкин. Тыуған телгә һөйөү тәрбиәләү мәғариф учреждениеларында ла, ғаиләлә лә алып барылырға тейеш.
Шул уҡ ваҡытта ҡануни дәүләттә йәшәүебеҙҙе лә оноторға ярамай, закондарҙың теүәл үтәлеүе, бер кемдең дә хоҡуҡтары сикләнмәүе шарт. Әлеге ваҡытта законға ярашлы, туған телдәрҙе уҡытыу ата-әсәләрҙең ғаризаһы нигеҙендә алып барыла. Йәғни, һайлау мөмкинлеге бирелгән.
Рәмзиә Кәримова
