Ярым емерек стеналар, тирә-яҡта сүп-сар өйөмө һәм бысраҡ. Бер йыл элек Валентина Чистякова тап ошондай картинаны үҙ фатиры тәҙрәһенән күҙәткән. Кесе урман заводы урамы 2 адресы буйынса барак ул йәшәгән йорт күршеһендә урынлашҡан булған.
Бинаның эстетик йөҙө генә түгел, ә балалар ғүмере өсөн борсолоу ҙа бында йәшәүселәрҙе үҙҙәренең проблемаһы хаҡында социаль селтәрҙәрҙә яҙып сығырға мәжбүр иткән. Граждандарҙың мөрәжәғәтен «Инцидент менеджмент» программаһы теркәгән.
Иң беренсе нәүбәттә авариялы ситуацияны хәл итеп, иҫкергән йортто һүтәләр. Хәүефте бөтөргәндән һуң Ленин районының коммуналь һәм төҙөкләндереү хеҙмәттәре биләмәне таҙартыуға тотона. Ҡаты тормош-көнкүреш ҡалдыҡтар полигонына мең кубометрҙан ашыу сүп сығарыла.
Кесе урман заводы урамының икенсе йортонан иҫке барак фотһүрәтенән һәм бында йәшәүселәрҙең иҫтәлектәренән башҡа бер нимә лә ҡалмаған тип әйтергә була. Тиҙҙән Валентина Чистякова һәм уның күп фатирлы йортта йәшәгән күршеләре үҙ тәҙрәләренән төҙөкләндерелгән биләмәлә заманса биҙәлгән йәшел зонаны күреп ҡыуанырбыҙ тип ышана.
Гүзәл Борханова
