Майҙан алып капиталь ремонт барған торлаҡтың бер нисә фатирында стеналар боҙолоп, электр сымдары зыян күргән. Подрядсы ойошма вәкилдәре ремонт менән бәйле етешһеҙлектәрҙе бөтөрөү өҫтөндә эш алып бара, әммә зыян күреүселәр дәғүә белдерә. Тулыраҡ мәғлүмәт киләһе яҙмала.
Өс йыл элек фатирына ремонт яһаған Никита Грушин боҙолған обойҙарын күрһәтеп зарлана. Күп ҡатлы торлаҡта подрядсы ойошма капиталь төҙөкләндереү эштәрен алып барғанда көслө ямғыр яуып, Юрий Гагарин, 45-се йорт адресы буйынса йәшәүселәрҙең өйҙәренә һәм подъездарына һыу үткән.
Графикҡа ярашлы, капиталь ремонт барған йортта әле лә төҙөкләндереү эштәре дауам итә. Подрядсы ойошма вәкилдәре етешһеҙлектәрҙе төҙәтә. Ойошма етәкселеге белдереүенсә, ремонт сифатлы башҡарылған, әммә түбәне алмаштырғанда нығытылып өлгөрмәгән торбалар зыян күргән.
1989 йылда төҙөлгән күп ҡатлы йортта капиталь ремонтҡа тиклем дә түбәнән һыу үткән булған. Шуға ла подрядсы ойошма вәкилдәре ремонтты сифатлы башҡармаһа төҙөкләндереү өсөн ойошмаға аҡса түләнмәйәсәк.
Белгестәр әйтеүенсә, күп ҡатлы йорттарҙың ҡыйыҡтарын төҙөкләндереүҙә эшселәрҙең тырышлығынан тыш һауа шарттары ла мөһим роль уйнай. Төҙөкләндереү ваҡытында нығытылмаған конструкциялар ел-дауылға, көслө ямғырҙарға бирешеп бара. Шуға ла етешһеҙлектәр булған осраҡта ла уларҙы тиҙ генә бөтөрөү подрядсы ойошма яуаплығында.
Флорида Ким
