Өфөнән – Ҡаф тауына! Башҡортостан вәкилдәре Кавказға юлланды. Төркөмдө Рус география йәмғиәтенең Башҡортостан бүлексәһе рәйесе, Башҡорт дәүләт педагогия университеты ректоры Салауат Сәғитов етәкләй.
Сәфәрҙә ҡатнашыусылар Мостай Кәрим бейеклегенә күтәрелергә ниәтләй. 2018 йылда шағирҙың 100 йыллығы уңайынан Башҡортостан альпинистары 3 мең 550 метрлыҡ түбәгә уның исемен бирҙе. Салауат Сәғитов белдереүенсә, тауға менеү өсөн махсус альпинист әҙерлеге кәрәкмәй, физик яҡтан ныҡ кешеләр тауҙа еңел күтәрелә.
Мостай Кәрим түбәһен туристар яҡшы белә. Эргәлә генә әҙиптең дуҫы Ҡайсын Кулиев ҡаяһы урынлашҡан. Ул диңгеҙ кимәленән 4 мең метр бейеклектә. Мостай Кәрим түбәһенә экспедиция ағзалары Бөтә донъя фольклориадаһы байрағын күтәрергә ниәтләй.
