"Өфө" аэропортында 6-сы Бөтә донъя фольклориадаһының сит ил делегацияларын ҡаршы алдылар. Мәскәүҙән тәүге чартер рейстар ойошторолдо. Коронавирус пандемияһына бәйле, эпидемиологик талаптар үтәлеше етди контролдә. Һәр делегацияға фестивалдә ҡатнашыуға айырым автобус бүленгән. Ҡунаҡтар менән тәүгеләрҙән булып БЮТ каналының ижади төркөмө лә осрашты.
"Өфө" аэропортында сит ил делегацияларын башҡорт көйҙәре, сәк-сәк менән ҡаршы алдылар. Гавайиның фольклор ансамбле составында тотош бер ғаилә ағзалары. Коллектив етәксеһе билдәләүенсә, мәҙәниәт илдәр араһындағы бәйләнештәрҙе нығыта. 1978 йылда ул СССР-ға тәүге тапҡыр килеп, йәйге Олимпия уйындары алдынан сығыш яһаған. Хозур тәбиғәтле Башҡортостанға ла икенсегә килгән. Шуға ҡурай моңдары менән дә яҡшы таныш.
Америка Ҡушма штаттары вәкилдәренән тыш, иртәнге чартер рейста тағы ла дүрт ил ижади коллективтары Мәскәүҙән Өфөгә килде. Ике-өс тәүлек юлда булып, ҙур сумаҙандар йөкмәп килеүҙәренә ҡарамаҫтан, артистарҙың кәйефтәре күтәренке.
Фольклориада ваҡытында эпидемиологик талаптар ҡәтғи буласаҡ. Аэропортта уҡ пассажирҙарҙың коронавирус менән ауырымауҙары тураһындағы документтары тикшерелде. Сир таралыуға юл ҡуймаҫ өсөн барлыҡ концерт программалары, күргәҙмәләр асыҡ һауала уҙғарыласаҡ. Делегацияларға миллионға яҡын битлек тә әҙерләнгән. Айырым автобустар бүленгән. Шифахана-ҡунаҡханаларға тиклем уларҙы ирекмәндәр оҙатты. Ҡунаҡтар өсөн экскурсиялар ҙа планлаштырыла.
Әлегә ижади коллективтарҙы репетициялар көтә. Фольклориадаға старт бирелгәс тә, улар бер аҙна дауамында республика буйлап сәйәхәт ҡылып, урындағы халыҡты мәҙәниәте, йолалары, ғөрөф-ғәҙәттәре менән таныштырасаҡ.
Бразилия карнавалына тиң парад, 100-ҙән ашыу милләт вәкилен берләштергән дуҫлыҡ хороводы, халыҡ кәсептәре һәм һөнәрҙәр күргәҙмәһе - Өфө 3 июлдән донъя мәҙәниәтен берләштергән фольклориада мәккәһенә әйләнә. Төп концерт майҙансығы Конгресс-холл янындағы амфитеатрҙа. Донъя кимәлендә ойошторолған Күләмле сараға глобаль селтәрҙәр аша ла миллиондарса кеше тамаша ҡылыр тип көтөлә.
Гөлназ Хәйбуллина
