Шаран районының Баҙғыя ауылында урынлашҡан өлкән йәштәгеләр өсөн йорт-интернатында яңы ғаилә барлыҡҡа килде.
Социаль интернатта 78 йәшлек Нәзирә Потапова менән 68 йәшлек Фәрис Шакиров рәсми рәүештә никахтарын теркәне. Яңы ғаилә башлығы йорт-интернатта 2009, Нәзирә Потапова 2015 йылдан алып йәшәй. Бер нисә йыл бер-береһенә терәк һәм кәңәшсе булып йөрөгәндән һуң улар бер ғаилә булып йәшәргә ҡарар итә.
Никах кенәгәһенә ҡул ҡуйылғандан һуң, яңы ғаиләне Шаран районы хакимиәте башлығы Фидан Ишемғолов ҡотлап, уларға иҫтәлекле бүләктәр тапшырҙы. Йорт-интернат хеҙмәткәрҙәр кейәү менән кәләште туй ашы менән һыйланы.
Интернат персоналы бында йәшәүселәр күңел бушлығы тоймаһын өсөн күп көс һала. Бөгөнгө никах теркәү тантанаһы ла йорт-интернат өсөн тәүгеһе түгел. Бынан ике йыл элек социаль учреждениела райондың ЗАГС бүлеге хеҙмәткәрҙәре тарафынан тәүге никах теркәлгән булған.
Гөлдәриә Йосопова
