Республикала үлемесле авариялар статистикаһын кәметеү маҡсатында йәй дауамында өҫтәмә йөҙ фото-видео теркәү камераһы ҡуйыласаҡ. Төбәк етәксеһе Радий Хәбиров юлдағы хәүефһеҙлекте көсәйтергә ҡушты. БЮТ каналы хәбәрсеһе Гөлназ Хәйбуллина дауам итә.
Ҡырмыҫҡалы районындағы юл киҫелешендә водителдәр хәҙер тиҙлекте кәметергә мәжбүр. Өфө-Ырымбур трассаһынан Боҙаяҙға табан боролошта ике фото-видео теркәү камераһы ҡуйылды. Юлда автомобиль хәрәкәте тулыһынса күҙәтеү аҫтында булһын өсөн - ҡоролманы һәр миллиметрға тиклем үлсәп урынлаштыралар.
Камера теркәгән тәртип боҙоуҙар мәғлүмәт эшкәртеү үҙәгенә ебәрелә. Шуға штрафтар ҙа үҙҙәрен оҙаҡ көттөрмәй. Фото-видео теркәү системаһы йәшендән һаҡлаусы саралар менән тәьмин ителгән, тотороҡһоҙ һауа торошо ла техниканы эшлектән сығара алмаясаҡ. Дөйөм алғанда, федераль трассаларҙа көҙгә тиклем йөҙ комплекс ҡуйыу планлаштырылған. Улар юл-транспорт ваҡиғалары күпләп теркәлгән участкаларҙа урынлаштырыла.
М-5 трассаһында өҫтәмә 32 камера барлыҡҡа килһә, М-7 магистралендә тағы ла егерме комплекс ҡуйыла. Шул уҡ ваҡытта Өфөнө көнсығыштан урау юлында ла фото-видеокүҙәтеү көсәйтелә. Бындай ҡәтғи саралар дыуамал водителдәрҙе туҡтатырға ярҙам итер тип көтөлә. Яңы ҡуйылған ҡоролмалар иһә юғары тиҙлектә йөрөүселәрҙе теркәй башланы. Тиҙҙән уҙышырға яратыусыларға бәхет хаттары киләсәк.
Гөлназ Хәйбуллина
